© APA | Ukrayna Futbol Assosiasiyasının (UAF) keçmiş prezidenti Andrey Pavelko
Slovakiyada Ukrayna Futbol Assosiasiyasının (UAF) keçmiş prezidenti Andrey Pavelko saxlanılıb.
Qurum şübhəlinin adını açıqlamasa da, Ukrayna KİV-i söhbətin məhz Andrey Pavelkodan getdiyini yazıb.
Baş Prokurorluğun məlumatına görə, şübhəli uzun illər Ukrayna ədalət mühakiməsindən gizlənib. O, beynəlxalq axtarışa verildikdən və xarici ölkələrin hüquq-mühafizə orqanları ilə əməkdaşlıq nəticəsində Slovakiyada saxlanılıb.
İstintaqın iddiasına əsasən, Pavelko nəzarətində olan kommersiya qurumları vasitəsilə UAF-dən təxminən 295 milyon qrivnanın mənimsənilməsi sxemini təşkil edib. Bildirilir ki, bunun üçün dəniz məhsulları, elit çay və qəhvə növləri, eləcə də elektrik avadanlıqlarının tədarükü ilə bağlı yalnız kağız üzərində mövcud olan saxta müqavilələr bağlanıb.
Baş Prokurorluq qeyd edib ki, nəticədə vəsaitlər mənimsənilib, Ukrayna Futbol Federasiyasına və onun regional bölmələrinə milyonlarla qrivna ziyan dəyib.
Qurum əlavə edib ki, Ukrayna artıq Pavelkonun ekstradisiyası proseduruna başlayıb. Bu məqsədlə Slovakiyanın səlahiyyətli orqanlarına onun Ukraynaya təhvil verilməsi və müvəqqəti həbsinin tətbiqi ilə bağlı müraciət göndərilib.
Xatırladaq ki, Andrey Pavelko 2023-cü ildə maliyyə pozuntuları ilə bağlı istintaq çərçivəsində həbs edilmişdi.
Slovakiyada Ukrayna Futbol Assosiasiyasının keçmiş prezidenti saxlanılıb
Ermənistanda “Ararat” konyak zavodunun direktoru saxlanılıb
